so.e huon men ḳhvab se bedar kaun hai
is alam-e-ḳhayal men hushiyar kaun hai
mat puchh us ka talib-e-didar kaun hai
ye dekh mohr-bar-lab-e-guftar kaun hai
utra hai chand siine men ya ḳhud hi jal uThe
tarikiyon men dil ki ziya-bar kaun hai
arz-e-hunar men koh-e-vafa par ho tesha-zan
de jaan nazr-e-sho.ala-e-izhar kaun hai
jo fan-taraziyan qad-o-gesu ki bhanp le
jo janch le qayamat-e-raftar kaun hai
sab apne apne dar-o-rasan saath le chalo
puchhenge vo ki tum men vafadar kaun hai
kuchh log apne ḳhuun men naha kar chale ga.e
ab surḳh-ru-e-arsa-e-paikar kaun hai
do-gam dil ki raah pe chalna muhal hai
ab aur aisi vadi-e-pur-ḳhar kaun hai
patthar se aag aag se jo laa.e ju-e-shir
tum men vo tesha-dar-e-fusun-kar kaun hai
shayad koi paTakta hai sar chal ke dekhiye
‘baqar’ hai qais hai pas-e-divar kaun hai
Leave a Reply