Poet
sochon ke hathon ka gahna TuuT gaya
lafzon se lafzon ka rishta TuuT gaya
vaqt ne ninden chhin liin meri ankhon se
tu tha jis ki jaan vo sapna TuuT gaya
us ne bas ik phuul chaman men toḌa tha
mere andar jaane kya kya TuuT gaya
ab ke gaanv men jaana chaha tha lekin
aisi hui barsat ki rasta TuuT gaya
vaqt se loha lena asan kaam na tha
is koshish men haath hamara TuuT gaya
ham ḳhud us se tark-e-ta.alluq kar baiThe
jhuTa sachcha har ik va.ada TuuT gaya
kya batla.un kaun sa tha bazar ‘ḳhalish’
jis men mere dil ka jhumka TuuT gaya
Leave a Reply