Aslam Kolsarii
soch ki uljhi hui jhaḌi ki janib jo ga.i
aas ki rangin titli ḳhuun ka chhinTa ho ga.i
us ki ḳhushbu thi miri avaz thi kya chiiz thi
jo daricha toḌ kar nikli faza men kho ga.i
aḳhir-e-shab duur kohsaron se barfani hava
shahr men aa.i mire kamre men aa kar so ga.i
chand chhilkon aur ik buḌhi bhikaran ke siva
rail-gaḌi aḳhiri manzil pe ḳhali ho ga.i
is qadar mela na tha jis par kisi ka naam tha
phir bhi ‘aslam’ aankh chhalki aur kaghaz dho ga.i
Leave a Reply