So Ab Tabir Ki Dhun Hai Ki Dekhe Ja Chuke Hain

Raz Ehtisham

so ab ta.abir ki dhun hai ki dekhe ja chuke hain

vagarna ḳhvab-e-na-mumkin se aage ja chuke hain

hamare zimme hai a.indagan ki maut ka dukh

aur un ka gham jo ham logon se pahle ja chuke hain

bahut se log ab bad-zan hain gaanv ke ḳhuda se

bahut se log shahron men kamane ja chuke hain

ham a.inda zamanon ki ghazal tartib denge

tumhari be-ruḳhi par sher likkhe ja chuke hain

mire bhaa.i main kahta tha ki avazon se mat Dar

tu jin ke Dar se chup baiTha tha sun le ja chuke hain