sitam men taab kam ho to pashemani men rahti hain
mire gham se miri ḳhushiyan pareshani men rahti hain
tumhari shakl in ankhon men aa jaati hai din Dhalte
ye donon sipiyan phir raat bhar paani men rahti hain
jo dard-e-zaḳhm baḌhta hai to lutf-andoz hota huun
miri sab rahaten us ki namak-dani men rahti hain
mire andar ke gham bahar bhi zahir hote rahte hain
ye dil ki silvaTen hain jo ki peshani men rahti hain
azal se hai hamari ankhon men paivast a.ina
so in men jhankne vaali bhi hairani men rahti hain
tumhen main chuum luun chhu luun zara ik sharm hai varna
ye saari justujuen hadd-e-imkani men rahti hain
Leave a Reply