Vishal Khullar
main insan tha ḳhuda hone se pahle
anal-haq ki ana hone se pahle
sila tha umr-bhar ki chahaton ka
vo ik lamha juda hone se pahle
na jaane kis qadar masruf hoga
tira vada-vafa hone se pahle
tu meri chahaton men gum hua hai
main ḳhushbu tha tira hone se pahle
miri gahra.iyon men raaz tere
main barsa huun ghaTa hone se pahle
ada ye raas aa.i thi hamen bhi
naya dikhna naya hone se pahle
jala.e rakh charagh-e-arzu yuun
dua paḌhna dava hone se pahle
ye naghma sa ye ‘khullar’ sher tera
ibadat tha ada hone se pahle
Leave a Reply