Main Insan Tha KHuda Hone Se Pahle

maiñ insāñ thā ḳhudā hone se pahle

anal-haq kī anā hone se pahle

sila thā umr-bhar kī chāhatoñ kā

vo ik lamha judā hone se pahle

na jaane kis qadar masrūf hogā

tirā vāda-vafā hone se pahle

tū merī chāhatoñ meñ gum huā hai

maiñ ḳhushbū thā tirā hone se pahle

mirī gahrā.iyoñ meñ raaz tere

maiñ barsā huuñ ghaTā hone se pahle

adā ye raas aa.ī thī hameñ bhī

nayā dikhnā nayā hone se pahle

jalā.e rakh charāġh-e-ārzū yuuñ

duā paḌhnā davā hone se pahle

ye naġhma sā ye ‘khullar’ sher terā

ibādat thā adā hone se pahle

Leave a Comment