umiid TuuTi hui ḳhak-dan men raushan hai
koi charagh to dil ke makan men raushan hai
sunahri dhuup ka patta ḳhizan men raushan hai
ki aa.ina koi abr-e-ravan men raushan hai
junun hamara makan la-makan men raushan hai
hamari gard-e-safar asman men raushan hai
qadam qadam pe hai ab zina-e-zaval to kya
sar-e-ghurur hamara jahan men raushan hai
kahan ki vahshaten divar-o-bam-o-dar par hain
ajiib ḳhauf mire sehn-e-jan men raushan hain
‘munir’ ankhon men chingariyan si uḌne lagin
koi to chashma-e-reg-e-ravan men raushan hai
Leave a Reply