ahmad-nadeem-qasmi

Shuur Mein Kabhi Ehsas Mein Basaun Use

shuur men kabhi ehsas men basaun use

magar main chaar taraf be-hijab paun use

agarche fart-e-haya se nazar na aauun use

vo ruuth jaae to sau tarah se manaun use

tavil hijr ka ye jabr hai ki sochta huun

jo dil men basta hai ab haath bhi lagaun use

use bula ke mila umr bhar ka sannata

magar ye shauq ki ik baar phir bulaun use

andheri raat men jab rasta nahin milta

main sochta huun kahan ja ke DhunD laun use

abhi tak us ka tasavvur to mere bas men hai

vo dost hai to khuda kis liye banaun use

‘nadim’ tark-e-mohabbat ko ek umr hui

main ab bhi soch raha huun ki bhuul jaun use

More Poems

Leave a Comment