Muslim Shameem
sho.ale baras rahe hain lab-e-juebar se
hai muḳhtalif bahar ye kitni bahar se
zindan ki tirgi ho ki maqtal ki ḳhamushi
hain mutma.in kisi na kisi e’tibar se
kaise kahen ki barish-e-ḳhun ki umiid thi
saa.e to muḳhtalif na the abr-e-bahar se
un ki jabin pe shabnam-e-ehsas-e-dilbari
tashbih dijiye guhar-e-tabdar se
us jaan sher-o-fan se ‘shamim’ aaj guftugu
aghaz kijiye ghazal-e-ḳhush-gavar se
Leave a Reply