koi ahd-e-vafa bhula hua huun
nahin kuchh yaad kya bhula hua huun
ḳhabar-giri karunga kya kisi ki
main ḳhud apna pata bhula hua huun
agar mangon to shayad pa sakun kuchh
magar harf-e-dua bhula hua huun
ḳhud apne shahr hi men huun musafir
main ghar ka rasta bhula hua huun
mujhe hai yaad jo tujh se suna tha
ḳhud apna hi kaha bhula hua huun
huun zinda is liye furqat men ab tak
ki nashsha vasl ka bhula hua huun
dua.en mangta huun sab ki ḳhatir
ḳhud apna mudda.a bhula hua huun
gham-e-duniya gham-e-dauran gham-e-dil
sabhi tere siva bhula hua huun
‘nadim’ us ke bina jivan ye mera
jaza hai ya saza bhula hua huun
Leave a Reply