shikva nasib ka na kare baar baar tu
mushkil hayat hans ke hamesha guzar tu
kyuun fikr hal-o-mazi ki karta hai roz-o-shab
sab us ko iḳhtiyar hai be-iḳhtiyar tu
mayus kyuun jafaon se hota hai be-vajah
sab ke gale men Daal vafaon ke haar tu
ḳhuddar ban ḳhudi ki talab le ke ji sada
be-fikr us pe jaan bhi kar de nisar tu
vo sar-parast hai to ‘saba’ tujh ko naaz hai
apna maqam jaan le ḳhud ko sanvar tu
Leave a Reply