Abdul Salam
sher kahne ki tabiat na rahi
jis se aamad thi vo surat na rahi
us ki dahliz se uth jaun magar
log sochenge mohabbat na rahi
ab mila adl, gaya daur-e-shabab
munsifi teri bhi vaqat na rahi
vaqt ki daud men rukna tha kathin
saans lene ki bhi fursat na rahi
vaqt-e-didar ajab hukm hua
hosh khone ki ijazat na rahi
tum se jazbat the jab tum hi nahin
phir zamane se shikayat na rahi
main nikal aauun bayaban se agar
shohra ho jaega vahshat na rahi
bhiid men dhunden kahan qais ko ab
vo jo pahchan thi vahshat na rahi
daur-e-rafta ke namune ho ‘salam’
ab takalluf ki zarurat na rahi
Leave a Reply