shayad mujhe tum ne kabhi samjha bhi nahin tha
main varna zamane men muamma bhi nahin tha
kuchh der chamakta mire ghar men to vo kaise
vo to miri palkon ka sitara bhi nahin tha
jaisa mujhe barbad-e-jahan us ne kiya hai
is tarah to main ne kabhi socha bhi nahin tha
dekha to ye socha ki hamesha se huun vaqif
pahle to agarche use dekha bhi nahin tha
avaz diye jaata tha dil duur se us ko
go us ne palaT kar mujhe dekha bhi nahin tha
vaqif hue duniya se to malum hua ye
apna jise samjhe the vo apna bhi nahin tha
kahne ki hai ye baat ki vo chhoḌta duniya
sachcha tha vo ‘adil’ magar itna bhi nahin tha
Leave a Reply