Mohammad Alvi
yuun to kam kam thi mohabbat us ki
kam na thi phir bhi rifaqat us ki
saare dukh bhuul ke hans leta tha
ye bhi thi ek karamat us ki
uljhanen aur bhi thiin us ke liye
ek main bhi tha musibat us ki
pahle bhi piine ko ji karta tha
mil hi jaati thi ijazat us ki
ḳhvab men jaise chala karta huun
dekhta rahta huun surat us ki
naam rahta hai zaban par us ka
ghar men rahti hai zarurat us ki
us ki aadat thi shararat karna
kaash ye bhi ho shararat us ki
phailte baḌhte hue bistar men
DhunDhta rahta huun qurbat us ki
ek bosida sa ghar chhoḌ ga.i
le ga.i saath vo jannat us ki
Leave a Reply