Shauq Se Dil Ko Tah-E-Tegh-E-Nazar Hone Do

shauq se dil ko tah-e-tegh-e-nazar hone do

jis taraf us ki tabiat hai udhar hone do

dil ki kya asl hai patthar bhi pighal jaenge

ai buto tum mire nalon men asar hone do

ghair to rahte hain din raat tumhare dil men

kabhi is ghar men hamara bhi guzar hone do

naseho ham to kharidenge mata-e-ulfat

tum ko kya faeda hota hai zarar hone do

valvale agli mohabbat ke kahan se laaen

aur paida koi dil aur jigar hone do

chhedne ko mire darban kaha karte hain

thahro jaldi na karo un ko khabar hone do

kyuun maza dekh liya dil ki kashish ka tum ne

ham na kahte the mohabbat men asar hone do

ai shab-e-vasl-o-shab-e-aish-e-javani thahro

main bhi hamrah tumhare huun sahar hone do

ranj o rahat hai bashar hi ke liye ai ‘jauhar’

vo bhi din dekh liye yuun bhi basar hone do

Leave a Comment