Sharminda Unhen Aur Bhi Ai Mere KHuda Kar

sharminda unheñ aur bhī ai mere ḳhudā kar

dastār jinheñ dī hai unheñ sar bhī atā kar

luuTā hai sadā jis ne hameñ dost banā kar

ham ḳhush haiñ usī shaḳhs se phir haath milā kar

Dar hai ki na le jaa.e vo ham ko bhī churā kar

ham laa.e haiñ ghar meñ jise mehmān banā kar

ik mauj dabe paañv ta.āqub meñ chalī aa.ī

ham ḳhush the bahut ret kī dīvār banā kar

ham chāheñ ki mil jaa.eñ hameñ Dher se motī

sīḌhī kisī pur-haul samundar meñ lagā kar

darkār ujālā hai magar sahme hue haiñ

kar de na añdherā koī bārūd jalā kar

le is ne tirā kāsa-e-jāñ toḌ hī Daalā

jā kūcha-e-qātil meñ ‘qatīl’ aur sadā kar

Leave a Comment