Rasheed Lakhnavi
sharab-e-nab ka qatra jo saghar se nikal jaa.e
taḌap ke dil mira qabu-e-dil-bar se nikal jaa.e
ḳhushi men kah raha huun aamad aamad hai jo us gul ki
koi kah de ki virani mire ghar se nikal jaa.e
satate hain raqib aa aa ke main go chhup ke baiTha huun
ajab ye zulm hai koi kidhar ghar se nikal jaa.e
agar sun le ki tere saḳht-jan ki baari aa pahunchi
simaT kar ab-e-ḳhanjar chashm-e-jauhar se nikal jaa.e
nikalo roz ghar se Dar nahin lekin ye hai dhaḌka
ki mera naam hi ik din na daftar se nikal jaa.e
ghaTa ke main ne apna shauq-e-dil likkha hai janan ko
ki uḌne men na ḳhat aage kabutar se nikal jaa.e
na jaane ki karo jaldi ki qissa ḳhatm hota hai
Thahar jaao zara dam jism-e-laghar se nikal jaa.e
qafas men daam men mere phaḌakne ka ye baa.is hai
hava parvaz karne ki mire par se nikal jaa.e
ijazat abr ko dar par Thaharne ki nahin dete
bas itna hukm hai aa ke faqat barse nikal jaa.e
‘rashid’-e-soḳhta-dil sar paTakne par hai amada
kaho har ik sharar se jald patthar se nikal jaa.e
Leave a Reply