Malikzaada Manzoor Ahmad
sham.a ki tarah shab-e-gham men pighalte rahiye
sub.h ho ja.egi julte hain to jalte rahiye
vaqt chalta hai uḌata hua lamhat ki gard
pairahan fikr ka har roz badalte rahiye
aa.ina samne aa.ega to sach bolega
aap chehre jo badalte hain badalte rahiye
aa.i manzil to qadam aap hi ruk ja.enge
ziist ko rah-e-safar jaan ke chalte rahiye
sub.h ho ja.egi haath aa na sakega mahtab
aap agar ḳhvab men chalte hain to chalte rahiye
ahd-e-imroz ho ya vada-e-farda ‘manzur’
TuTne vaale khilaune hain bahalte rahiye
Leave a Reply