ye har shab soch kar sota huun aane vaali sub.hon men
gulon se pattiyon se os ki bunden churani hain
shah akash ki nazren-numa kirnon se pahle jaag jaana hai
saba-e-ambarin ke lams ko mahsus karna hai
libas-e-sabz men malbus alhad pattiyon ki baten sunni hain
hasin doshiza ki muskan si kaliyon se do ik baat kar lunga
magar kuchh kar nahin paata ki rahat roke rakhti hai
koi afsana padhna ho kisi ki shairi pe baat karni ho
kisi takhliq se pahle khayal-o-fikr ko azad rakhna ho
kisi sariq kisi shatir kisi kam-fahm se sachchai kahni ho
badi maasum shaklon men chhupe ayyar ko makkar ko shisha dikhana ho
faqih-e-vaqt amir-e-shahr ka qazzaq se malun se rishta batana ho
magar ye kar nahin sakta maslahat khamosh rakhti hai
harim-e-mai-kade men khanqahon math madrason men
barahman shaikh se pir-e-mughan se saqiyon se aur vaaiz se
ye aksar sochta huun ja ke kah duun main
riya-o-kibr tahi-ikhlas aur bad-atvari se tere
jahan men ishq ukhuvvat ilm aur akhlaq marte hain
magar main kah nahin sakta aqidat baaz rakhti hai
taassub khud-pasandi bughz se kibr-o-hasad se
bisat-e-zehn-o-dil ko chahta huun paak kar luun
zar-o-imlak ki khvahish se apne aap ko azad kar luun
ki jab jab sai karta huun havas inkar karti hai
magar iqan hai mera hamare ahd ke bachche
mire kizb-o-riya ko makr ko aur be-imani ko
nafaq-o-bad-qimashi ko mire zahir ko batin ko
huvaida kar ke chhodenge alal-ailan kah denge
ki mere baap aise the mire ustaz aise the
so un ki baat se aamal se sharminda huun main bhi
ye kahne se unhen izzat na rokegi
na un ko khauf rokega
unhen kuchh bhi na rokega
chalan badla hua hoga
hamari saari izzat saari zillat dusron ke haq ki pamali
kitab-e-haq ke pannon par bahut vazeh likhi hongi
Leave a Reply