Shahab Jafri
shaam rakhti hai bahut dard se betab mujhe
le ke chhup ja kahin ai arzu-e-ḳhvab mujhe
ab main ik mauj-e-shab-e-tar huun sahil sahil
raah men chhoḌ gaya hai mira mahtab mujhe
ab tak ik sham-e-siyah-posh huun sahra sahra
tujh se chhuT kar na mili rahguzar-e-ḳhvab mujhe
sahil-e-ab-o-sarab ek hai manzil manzil
tishnagi karti hai sairab na gharqab mujhe
main bhi sahra huun mujhe sang samajhne vaalo
apni avaz se karte chalo sairab mujhe
main bhi dariya huun har ik samt ravan huun kab se
mera sahil bhi nahin manzil-e-payab mujhe
ab mujhe DhunDh na aghosh-e-gurezan har-su
le uḌi ḳhaak baha le gaya sailab mujhe
shaam puchhe to na kahna ki main duniya men nahin
le ke phir aa.ega is ghar men mira ḳhvab mujhe
Leave a Reply