Nigah-E-Mast-E-Saqi Ka Salam Aaya to Kya Hoga

nigah-e-mast-e-saqi ka salam aaya to kya hoga

agar phir tark-e-tauba ka payam aaya to kya hoga

haram vaale to puchhenge bata tu kis ka banda hai

ḳhuda se pahle lab par un ka naam aaya to kya hoga

mujhe manzur un se main na bolunga magar naseh

agar un ki nigahon ka salam aaya to kya hoga

chala hai aadmi tasḳhir-e-mehr-o-mah ki ḳhatir

magar sayyad hi ḳhud zer-e-dam aaya to kya hoga

mujhe tark-e-talab manzur lekin ye to batla do

koi ḳhud hi liye hathon men jaam aaya to kya hoga

mohabbat ke liye tark-e-ta.alluq hi zaruri ho

mohabbat men agar aisa maqam aaya to kya hoga

jahan kuchh ḳhaas logon par nigah-e-lutf hai ‘darshan’

agar us bazm men daur-e-avam aaya to kya hoga