junūn-e-ishq na kar iztirāb kī tauhīn
ye āh-e-nīm-shabī hai shabāb kī tauhīn
jis anjuman ko banāyā thā ham ne rashk-e-iram
vahīñ huī dil-e-ḳhāna-ḳharāb kī tauhīn
yahī tazād to raunaq-faroz-e-ālam hai
nahīñ ye tīra-shabī āftāb kī tauhīn
nazar uThā ki nazāroñ meñ jaan paḌ jaa.e
hijāb-e-kam-nazarī hai hijāb kī tauhīn
ḳhayāl-e-tauba mujhe yuuñ to hai magar saaqī
na hogī mujh se shab-e-māhtāb kī tauhīn