junun-e-ishq na kar iztirab ki tauhin
ye ah-e-nim-shabi hai shabab ki tauhin
jis anjuman ko banaya tha ham ne rashk-e-iram
vahin hui dil-e-ḳhana-ḳharab ki tauhin
yahi tazad to raunaq-faroz-e-alam hai
nahin ye tira-shabi aftab ki tauhin
nazar uTha ki nazaron men jaan paḌ jaa.e
hijab-e-kam-nazari hai hijab ki tauhin
ḳhayal-e-tauba mujhe yuun to hai magar saaqi
na hogi mujh se shab-e-mahtab ki tauhin
Leave a Reply