sham-o-gul ne saj to di mahfil tiri tere baghair
vo rahi apni jagah jo thi kami tere baghair
amad-o-raft-e-nafas dushvar thi tere baghair
ek nashtar sa chubha jab saans li tere baghair
ho ga.iin thiin sab bhali baten buri tere baghair
haan magar achchhi hui to sha.iri tere baghair
haa.e dil jis ki umangen thiin baharen baagh ki
vo miri jannat jahannam ban ga.i tere baghair
tha bahut mumkin ki bach jaati gham-e-duniya se jaan
sach to ye hai ham ne koshish bhi na ki tere baghair
mujh ko rone se mile fursat to phir DhunDun use
hans raha hai kaun qismat ka dhani tere baghair
jaane vaale ja ḳhuda hafiz magar ye soch le
kuchh se kuchh ho ja.egi divangi tere baghair
tere divane bhi puuje ja.enge ik din yuun hi
ho rahi hai jaise teri bandagi tere baghair
tera ‘manzar’ jo kabhi tha andalib-e-ḳhush-nava
kho gaya duniya se yuun chup saadh li tere baghair
Leave a Reply