sha.iri meri gham-e-ishq ki tafsir bhi hai
ramish-o-rang ke lamhat ki tasvir bhi hai
muzhda-e-amn bhi hai meri nava-e-hasti
vaqt ke haath men chalti hui shamshir bhi hai
saaz uThata huun magar yaad rahe ahl-e-nishat
saaz ki lai men nihan soz ki tasir bhi hai
zindagi ḳhvab sahi ḳhvab-e-pareshan hi sahi
dil ye kahta hai yahi ḳhvab ki ta.abir bhi hai
na-shunida se jo ab tak mire naghme hain ‘jamal’
kuchh zamane ki ḳhata kuchh miri taqsir bhi hai
Leave a Reply