gham-e-dauran gham-e-janan ka nishan hai ki jo tha
vasf-e-ḳhuban ba-hadis-e-digran hai ki jo tha
lazzat-e-arz-e-vafa rahat-e-jan hai ki jo thi
dil-tapan ashk-e-ravan shauq-e-javan hai ki jo tha
shar.a-o-a.in ki ta.azir ke ba-vasf shabab
lab-o-ruḳhsar ki janib nigaran hai ki jo tha
mere paanv se hain uljhe ho.e resham ke se taar
hamdamo ye to vahi band-e-giran hai ki jo tha
ishq ki tarz-e-takallum vahi chup hai ki jo thi
lab-e-ḳhush-gu-e-havas mahv-e-bayan hai ki jo tha
rah-rau dasht men fariyad-kunan hain ki jo tha
ḳhanda-zan qafila rah-e-baran hai ki jo tha
mughbache ḳhush hain ki bazm un ki hai saaqi un ka
bar-sar-e-kar vahi pir-e-mughan hai ki jo tha
jalva-e-yar se kya shikva-e-be-ja kiije
shauq-e-didar ka aalam vo kahan hai ki jo tha
halqa-e-vaz se ab tak hai gurezan duniya
halqa-e-zulf madar-e-do-jahan hai ki jo tha
mere hansne pe ḳhafa the mire rone pe hanse
vahi rang-e-sitam ishva-giran hai ki jo tha
sang-e-tiflan se zara bach ke rahe qasr-e-buland
ye vahi kar-gah-e-shisha-garan hai ki jo tha
dosto ham-nafaso sunte ho ‘abid’ ki ghazal
ye vahi sho.ala-nava soḳhta-jan hai ki jo tha
Leave a Reply