shahron shahron lashe dekho bikhre hain
hakim mere shahr ke andhe gunge hain
rone ki avazen hain ki rukti nahin
hakim-e-shahr ye kis ke bachche bhuke hain
badle hain halat faqih-e-shahr ke bas
logon ke halat bhala kab badle hain
lagte hain phaldar shajar par shayad saanp
kheton men ab shayad patthar ugte hain
in ka jurm faqat tha sach se agahi
shahr ke chauk men ye jo do sar laTke hain
faisle apni maut ke ham ne ḳhud ‘safdar’
de kar vote haan apne hathon likkhe hain
Leave a Reply