Shakeel Gwaliari
shahr ka shahr janta hai mujhe
shahr ke shahr se gila hai mujhe
mera bas ek hi Thikana hai
main kahan ja.unga pata hai mujhe
raushni men kahin ugal dega
mera saaya nigal gaya hai mujhe
ban gaya huun gunah ki tasvir
koi chhup chhup ke dekhta hai mujhe
raste bhi to so ga.e honge
apne bistar pe jagna hai mujhe
us ki baten samajh raha huun main
vo bhi lafzon men taulta hai mujhe
ye natija hai agahi ka ‘shakil’
aaj kal ik junun sa hai mujhe
Leave a Reply