shahr ka shahr basa hai mujh men
ek sahra bhi saja hai mujh men
ka.i din se koi avara ḳhayal
rasta bhuul raha hai mujh men
raat mahki to phir ankhen mal ke
koi sote se uTha hai mujh men
dhuup hai aur bahut hai lekin
chhanv is se bhi siva hai mujh men
kab se uljhe hain ye chehron ke hujum
kaun sa jaal bichha hai mujh men
koi aalam nahin banta mera
rang ḳhushbu se juda hai mujh men
aisa lagta hai ki jaise koi
a.ina TuuT gaya hai mujh men
aate jaate rahe mausam kya kya
jo faza thi vo faza hai mujh men
Leave a Reply