Siddique Afghani
shahr-e-ehsas men zaḳhmon ke ḳharidar bahut
haath men sang uTha shishon ke bazar bahut
koi khiḌki hai salamat na koi darvaza
mere ghar ke sabhi kamre hain hava-dar bahut
haath thakte nahin rangon ke hayule ban kar
ahl-e-fan ko sar-e-kaghaz ḳhat-e-pur-kar bahut
dasht men bhi vahi asar hain abadi ke
phailta jaata hai ab saya-e-divar bahut
dhuup ka phuul gira shaḳh-e-shafaq se jis dam
din ka chehra nazar aata tha shikan-dar bahut
naqsh hai zehn pe yuun tera tilismi paikar
main huun ḳhud apni nigahon men pur-asrar bahut
lafz kirnon ki tarah dil men utar jaate hain
dil nashin hai tira pairaya-e-iz.har bahut
ḳhauf dushman ki tarah mere ta.aqub men bhi tha
ḳhanjar-e-vahm ke main ne bhi sahe vaar bahut
tan ga.e itne mire gird havaon ke pahaḌ
saans lena bhi hai mere liye dushvar bahut
ab bhi lamhon se salasil ki khanak aati hai
ab bhi hain vaqt ke zindan men giraftar bahut
zaḳhm ke chand na raton ko mire dil men utaar
mere siine pe na rakh sang-e-giran-bar bahut
tirgi aa.e na ‘siddiq’ ziya ke nazdik
kaaT rakhti hai ye TuuTi hui talvar bahut
Leave a Reply