Mahendra Partap Chand
hamare shahr-e-adab men chali hava kya hai
ye kaisa daur hai yarab hamen hua kya hai
usi ne aag laga.i hai saari basti men
vahi ye puchh raha hai ki majra kya hai
ye tera zarf ki tu phir bhi bad-guman na hua
siva.e dard ke main ne tujhe diya kya hai
lapak ke chhin le haq apna kam-savadon se
baḌha ke haath uTha jaam dekhta kya hai
bhula diya hai jo tum ne to koi baat nahin
magar main janta aḳhir miri ḳhata kya hai
ajiib shaḳhs hai kirdar mangta hai mira
siva.e is ke mire paas ab bacha kya hai
kured kar mere zaḳhmon ko yuun saval na kar
tujhe ḳhabar hai to phir mujh se puchhta kya hai
mata-e-gham ko bacha rakh chhupa ke siine men
tu is ḳhazane ko auron men banTta kya hai
hazar ne.amaten us ne tujhe ata ki hain
ab aur ‘chand’ tu is dar se mangta kya hai
Leave a Reply