Shabab-E-Husn Hai Barq-O-Sharar Ki Manzil Hai

shabab-e-husn hai barq-o-sharar ki manzil hai

ye azma.ish-e-qalb-o-nazar ki manzil hai

savad-e-shams-o-qamar bhi bashar ki manzil hai

abhi to parvarish-e-bal-o-par ki manzil hai

ye mai-kada hai kalisa o ḳhanqah nahin

uruj-e-fikr o farogh-e-nazar ki manzil hai

hamen to raas hi aa.i fughan ki be-asari

magar batao to koi asar ki manzil hai

vo rahbari-e-janab-e-ḳhizar ki manzil thi

ye rahnuma.i-e-fikr-e-bashar ki manzil hai

ye raaz pa na sake sahiban-e-hosh-o-ḳhirad

junun bhi ik nigah-e-parda-dar ki manzil hai

qayam shamil-e-mashq-e-ḳhiram hai ‘taban’

safar ka tark bhi goya safar ki manzil hai