Abul Hasanat Haqqi
shab ko har rang men sailab tumhara dekhen
aankh khul jaae to dariya na kinara dekhen
dasht-e-aghosh men ram-khurda chikara dekhen
ye hasin khvab bhi ik roz qazara dekhen
jaane kya surat-e-halat raqam thi us men
jo varaq chaak hua us ko dobara dekhen
niind aae bhi to tasbih-e-badan karte hue
aur phir saath uthen sub.h ka taara dekhen
dekhte dekhte gum ho gae jal-thal se vo log
aish ko chaak karen dard ko pyara dekhen
Leave a Reply