Sawan Ki Purwai Ne Kya Dukhti choT Dikhai Hai

Talib Baghpati

savan ki purva.i ne kya dukhti choT dikha.i hai

kaise aansu umDe hain jab yaad tumhari aa.i hai

aankh se ojhal ho kar dil ko apni yaad dila.i hai

dil hi men aa baiThe ho ye aur qayamat Dhaa.i hai

aahen sard hui jaati hain tum aa.e ho ya sub.h hui

chand ki rangat phiki hai taron pe udasi chha.i hai

ik sannaTa sa taari hai char-pahar ke taḌke se

ḳhair to hai ye aaj mariz-e-hijr ne kya Thahra.i hai

duniya ka dastur yahi hai dil yuun kab tak ro.ega

in achchhi surat valon ne kis se piit nibha.i hai

badal chiḳh uTha hai bijli TuuT paḌi hai tharra kar

jab ham ne apni barsi-barsa.i aankh uTha.i hai

jism ke andar dil ki bechaini se ye ma.alum hua

is ghar men sab chizen apni hain ye chiiz para.i hai

ab marna bhi mushkil hai vo puchh rahe hain balin par

kis ne us ko yaad kiya hai kaisi hichki aa.i hai

tum aḳhir kyuun kuḌhte ho ‘talib’ ke rone-dhone par

duniya is par hansti hai sab kahte hain sauda.i hai