savab ki duaon ne gunah kar diya mujhe
badi ada se vaqt ne tabah kar diya mujhe
munafiqat ke shahr men sazaen harf ko milin
qalam ki raushnai ne siyah kar diya mujhe
mire liye har ik nazar malamaton men dhal gai
na kuchh kiya to hairat-e-nigah kar diya mujhe
khushi jo gham se mil gai to phuul aag ho gae
junun-e-bandagi ne khud-nigah kar diya mujhe
tamam aks tod ke mira saval baant ke
ik aaine ke shahr ki sipah kar diya mujhe
bada karam huzur ka suna gaya na haal bhi
samaaton men dafn ek aah kar diya mujhe
Leave a Reply