abhay-kumar-bebak

Furqat Se Ham-Kanar To Tu Bhi Hai Main Bhi Hun

furqat se ham-kanar to tu bhi hai main bhi huun

milne ko be-qarar to tu bhi hai main bhi huun

duniya men sar utha ke kahan tak chalenge ham

duniya se sharmsar to tu bhi hai main bhi huun

aisa karen ki baant len aapas ke ranj-o-gham

halat ka shikar to tu bhi hai main bhi huun

manzil ki aarzu men bhatakne ka shauq rakh

ik raah ka ghubar to tu bhi hai main bhi huun

mahfil men us ki ja ke magar kya karenge ham

ghairon men ab shumar to tu bhi hai main bhi huun

jo dil-fareb hain vahi manzar hain dil-nashin

kahne ko hoshiyar to tu bhi hai main bhi huun

‘bebak’ rukh pe chhane lage hain khizan ke rang

go hasil-e-bahar to tu bhi hai main bhi huun

More Poems

Leave a Comment