Poet
saath ghairon ke hai sada gaT-paT
ik hamin se rakhe hai dil men kapaT
changul-e-baz hain tiri mizhgan
ta.ir-e-dil ko pal men le hai jhapaT
teri is vaz-e-dil-ruba.i se
ghar ke ghar ho ga.e hain chuḌ-chapaT
vo bhi din phir dikha.ega allah
raat ko so.e tu gale se lipaT
paas jab ghair ko biThata hai
jaa.e hai dil tire milap se haT
dete ho baat baat men baazi
ek ho apne kaam ke naT-khaT
naaz ki tegh ghair par mat khinch
dil hamara kahin na jaave kaT
jis tarah chand par ho abr-e-siyah
zulf yuun mukhḌe par rahi hai ulaT
iid hai aaj aa gale mil len
dushmanon ki to jaa.e chhati phaT
gham men tere hain ashk yuun jaari
har ghaḌi jis tarah chale hai rahaT
ishq vo ghar hai jis ke shah-o-gada
ba-adab chumte rahe chaukhaT
kulle-shai-in-muhit ki taqrir
khaT se insan ke hue parghaT
dil-e-bechara ik tan-e-tanha
fauj-e-gham aa.e hai tamam simaT
dost ki ho madad to yak dam men
jaa.e ye ma.arka tamam palaT
yaan qadam raah par siva.e na rakh
ai ‘muhib’ raah ishq ki hai bikaT
Leave a Reply