Poet
kya shikva karen tohmat-e-be-bal-o-pari ka
har din hai shab-e-zulf ki bedad-gari ka
rahne do abhi baam pe khulti hui ankhen
manzar ye mire samne hai ḳhush-nazari ka
ik haath bulave ke liye rauzan-e-jan men
ik haath alamat hai kisi sabz-pari ka
ehsas-e-peshemani-e-ahbab na puchho
har ek ko yaan gham hai faqat be-hunari ka
divar-o-dar-o-saqf-o-sutun farsh-o-daricha
rishta kisi ghar se nahin hota safari ka
basti mire ahbab se ḳhali hai abhi tak
saaya hai miri jaan pe faqat bad-nazari ka
jaadu hai tire jism ke har pech men ḳham men
nashsha hai rag-o-pai men bhi shorida-sari ka
chalte rahe tujh tak hi pahunchne ke liye sab
sab rang uḌa jaata hai nadida-vari ka
in rozon hai badli hui ye tab.a hamari
ab ḳhushk raha karta hai mausam bhi tari ka
ham kab sar-o-saman-e-suḳhan se rahe ḳhali
ik umr se ye shaghl raha dard-sari ka
Leave a Reply