Shafiq Saleemi
saari ta.abiren hain us ki saare ḳhvab us ke liye
har saval us ke liye hai har javab us ke liye
hijr ke lamhe shumaren ya lakiren harf ham
har hisab us ke liye hai har kitab us ke liye
qurb us ka hai hamari vapsi ka muntazir
jhelte hain ham bhi duuri ka azaab us ke liye
vo hamare vaste rahta hai har dam muztarib
ham bhi hain aa.e hue zer-e-itab us ke liye
us ke har dukh ka mudava apne bas men bhi nahin
ashk-e-ḳhun us ke liye hain dil kabab us ke liye
man ki har ḳhvahish ko vaara us ki chahat par ‘shafiq’
khil rahe hain tan pe zaḳhmon ke gulab us ke liye
Leave a Reply