mile to kaash mira haath thaam kar le jaa.e
vo apne ghar na sahi mujh ko mere ghar le jaa.e
butan-e-shahr tumhare larazte hathon men
koi to sang ho aisa ki mera sar le jaa.e
diya karunga yunhi tere naam ki dastak
mira nasib mujhe laakh dar-ba-dar le jaa.e
vo aadmi ho ki ḳhushbu bahut hi rusva hai
hava-e-shahr jise apne dosh par le jaa.e
mire qarib se guzre to ahl-e-dil bole
uTha ke kaun parinda lahu men tar le jaa.e
palaT ke aa.e to shayad na kuchh dikha.i de
vo ja raha hai to ‘asim’ miri nazar le jaa.e
Leave a Reply