Sar-Ta-Pa Hairat Mein Gum Ho Jaega

Rashida Maheen Malik

sar-ta-pa hairat men gum ho ja.ega

tu bhi kya hairat men gum ho ja.ega

aadmi ban ja.ega taḳhliq-kar

aur ḳhuda hairat men gum ho ja.ega

dekh kar mujh a.ina-ru ka jamal

a.ina hairat men gum ho ja.ega

laash ko varis na pahchanenge aur

saneha hairat men gum ho ja.ega

raqs men honge dar-o-divar-o-bam

taḳhliya hairat men gum ho ja.ega

manzilen ma.adum ho ja.engi sab

rasta hairat men gum ho ja.ega

aql se bhi mavara sochunngi main

falsafa hairat men gum ho ja.ega

kya se kya ashkal badlengi yahan

kya se kya hairat men gum ho ja.ega

dekhna ye alam-e-ijad bhi

‘rashida’ hairat men gum ho ja.ega