Ehsan Danish
nazar fareb-e-qaza kha ga.i to kya hoga
hayat maut se Takra ga.i to kya hoga
ba-zom-e-hosh tajalli ki justuju be-sud
junun ki zad pe ḳhirad aa ga.i to kya hoga
na.i sahar ke bahut log muntazir hain magar
na.i sahar bhi jo kajla ga.i to kya hoga
na rahnumaon ki majlis men le chalo mujh ko
main be-adab huun hansi aa ga.i to kya hoga
shabab-e-lal-o-gul ko pukarne vaalo
ḳhizan-sarisht bahar aa ga.i to kya hoga
ḳhushi chhani hai to gham ka bhi e’timad na kar
jo ruuh gham se bhi ukta ga.i to kya hoga
ye fikr kar ki in asudgi ke dhokon men
tiri ḳhudi ko bhi maut aa ga.i to kya hoga
laraz rahe hain jigar jis se kohsaron ke
agar vo lahr yahan aa ga.i to kya hoga
vo maut jis ki ham ‘ehsan’ sun rahe hain ḳhabar
rumuz-e-zist bhi samjha ga.i to kya hoga
Leave a Reply