Maqsood Wafa
fasil-e-jan ke qaidi hain magar ye dhyan rakkha hai
hava ke vaste ham ne dar-e-imkan rakkha hai
saja sakte the yadon ke ka.i chehre ka.i paikar
magar kuchh soch kar ham ne ye ghar viran rakkha hai
hamen shauq-e-aziyyat hai vagarna is zamane men
tiri yaden bhulane ko bahut saman rakkha hai
tiri jholi men la Dalenge qarze is mohabbat ke
ki ham shorida-sar hain kab koi ehsan rakkha hai
shab-e-hijran men dar aati hain kaise ye mulaqaten
tamasha-ha-e-ḳhalvat ne hamen hairan rakkha hai
tumhen ye manna hoga ki ham ne apne lab si kar
sukut-e-shab ki muTThi men koi tufan rakkha hai
jo ho yaaro ba-har-surat charaghon ko jalana hai
hava.en kitni barham hain ye ham ne jaan rakkha hai
Leave a Reply