Hasan Abbas Raza
na arzuon ka chand chamka na qurbaton ke gulab mahke
na hijraton ka azaab sahte hue musafir gharon ko lauTe
na anganon men daraḳht-e-jan par visal-mausam ka bor jaaga
na Daali Daali kisi parinde ne ḳhushbuon ke tarane chheḌe
varaq varaq za.ichon men tahrir ek se the javab lekin
saval chakhne ki ḳhaam ḳhvahish men ham ne kya kya azaab chakkhe
bas ek Dhalvan darmiyan hai aur us se aage khula jahannam
na jaane kis pal ki ek laghzish azaab sadiyan sameT laa.e
hamen ḳhabar hai ki apne ghar ke charagh koi ghaḌi hain lekin
hamen yaqin hai ki raushni ki naved sunne talak jalenge
qabile vaalo uTho! aur apna bachav kar lo, ki main ne kal shab
fasil-e-shahr-e-aman ke bahar naqab-zanon ke giroh dekhe
Leave a Reply