Waqif Hain Hum Ki Hazrat-E-Gham Aise Shakhs Hain

vaqif hain ham ki hazrat-e-gham aise shaḳhs hain

aur phir ham un ke yaar hain ham aise shaḳhs hain

divane tere dasht men rakkhenge jab qadam

majnun bhi lega un ke qadam aise shaḳhs hain

jin pe hon aise zulm o sitam ham nahin vo log

hon roz balki lutf o karam aise shaḳhs hain

yuun to bahut hain aur bhi ḳhuban-e-dil-fareb

par jaise pur-fan aap hain kam aise shaḳhs hain

kya kya jafa-kashon pe hain un dilbaron ke zulm

aison ke sahte aise sitam aise shaḳhs hain

diin kya hai balki dijiye iman bhi unhen

zahid ye but ḳhuda ki qasam aise shaḳhs hain

azurda huun adu ke jo kahne pe ai ‘zafar’

ne aise shaḳhs vo hain na ham aise shaḳhs hain

Leave a Comment