ham samajhte hain jise apna jahan kuchh aur hai
ye zamin kuchh aur hai ye asman kuchh aur hai
ji rahe hain ham jise nachiz hai vo zindagi
ye ghubar-e-karvan hai karvan kuchh aur hai
kar raha huun main ada kirdar jis men ḳhud bhi ek
vo to afsana hai meri dastan kuchh aur hai
reg-zaron par tu jo chahe bana le naqsh-e-pa
pattharon par jo ubhar aa.e nishan kuchh aur hai
sa.eban hi dushman-e—azm-e-safar honge ‘nihal’
imtihan asan na samjho imtihan kuchh aur hai
Leave a Reply