fikr ka gar silsila maujud hai
faash hai vo bhi jo na-maujud hai
us se mujh se fasla kuchh bhi nahin
ek divar-e-ana maujud hai
sochta huun kuchh amal karta huun kuchh
mujh men koi dusra maujud hai
sunta rahta huun tire qadmon ki chaap
varna dil men aur kya maujud hai
hijr men roe to ji halka hua
dard ke andar dava maujud hai
haal puchha us ne mujh se baat ki
ab yaqin aaya khuda maujud hai
ab to ‘abid’ chashm-e-nam bhi hai khamosh
roz ik sadma naya maujud hai