Ai Subh Main Ab Kahan Raha Hun

ai subh main ab kahan raha huun

khvabon hi men sarf ho chuka huun

sab mere baghair mutmain hain

main sab ke baghair ji raha huun

kya hai jo badal gai hai duniya

main bhi to bahut badal gaya huun

go apne hazar naam rakh luun

par apne siva main aur kya huun

main jurm ka e’tiraf kar ke

kuchh aur hai jo chhupa gaya huun

main aur faqat usi ki khvahish

akhlaq men jhuut bolta huun

ik shakhs jo mujh se vaqt le kar

aaj aa na saka to khush hua huun

har shakhs se be-niyaz ho ja

phir sab se ye kah ki main khuda huun

charke to tujhe diye hain main ne

par khuun bhi main hi thukta huun

roya huun to apne doston men

par tujh se to hans ke hi mila huun

ai shakhs main teri justuju se

be-zar nahin huun thak gaya huun

main shaam o sahar ka naghma-gar tha

ab thak ke karahne laga huun

kal par hi rakho vafa ki baten

main aaj bahut bujha hua huun

Leave a Comment