Minnat-Kash-E-Ilaj-E-Masiha Nahin Raha

Muneer Ahmad Jami

minnat-kash-e-ilaj-e-masiha nahin raha

kya gham agar maraz se ifaqa nahin raha

kasrat men imtiyaz hai vahdat men kuchh nahin

qatra mila jo bahr men qatra nahin raha

dil men to jalva-gar hain nigahon se duur hain

parde ki baat ye hai ki parda nahin raha

jo bhi raha amal ke nata.ej se be-niyaz

hargiz vo na-murad-e-tamanna nahin raha

jis men ḳhudi nahin use jiine ka haq nahin

yaksan hai vo jahan men raha ya nahin raha

haan asman-e-gham mujhe ahl-e-zamin kahen

kab tar-e-ashk rashk-e-surayya nahin raha

‘za.iq’ agar ho kahni to kahiye mufid baat

harza-sara.iyon ka zamana nahin raha