Saqi-E-Gulfam Ba-Sad Ehtimam Aa Hi Gaya

Asrarul Haq Majaz

saqi-e-gulfam ba-sad ehtimam aa hi gaya

naghma bar lab khum ba sar baada ba jaam aa hi gaya

apni nazron men nashat-e-jalva-e-khuban liye

khalvati-e-khas su-e-bazm-e-am aa hi gaya

meri duniya jagmaga utthi kisi ke nuur se

mere gardun par mira mah-e-tamam aa hi gaya

jhuum jhuum utthe shajar kaliyon ne ankhen khol diin

janib-e-gulshan koi mast-e-khiram aa hi gaya

phir kisi ke samne chashm-e-tamanna jhuk gai

shauq ki shokhi men rang-e-ehtaram aa hi gaya

meri shab ab meri shab hai mera baada mere jaam

vo mira sarv-e-ravan mah-e-tamam aa hi gaya

bar-ha aisa hua hai yaad tak dil men na thi

bar-ha masti men lab par un ka naam aa hi gaya

zindagi ke khaka-e-sada ko rangin kar diya

husn kaam aae na aae ishq kaam aa hi gaya

khul gai thi saaf gardun ki haqiqat ai ‘majaz’

khairiyat guzri ki shahin zer-e-dam aa hi gaya