pesh-e-idrak miri fikr ke shane khul jaa.en
har taraf alam-e-imkan ke bahane khul jaa.en
tujh pe mauquf hai duniya ki tahi-damani
tu jo khul jaa.e to aalam ke ḳhazane khul jaa.en
phir se ankhon ko miri nur-e-basirat ho ata
is sanam-ḳhane men phir a.ina-ḳhane khul jaa.en
sham-e-hasti hui bedar falak se kah do
az.hdahan-e-shab-e-zulmat ke dahane khul jaa.en
ab koi dast-e-rifaqat na rakhe siine par
ain mumkin hai ki zaḳhmon ke muhane khul jaa.en
adh-khuli aankh men raqsan hai gham-e-mustaqbil
band ho aankh to gum-gashta zamane khul jaa.en
tu agar fikr ki parvaz ko baḳhshe rif.at
kaun jaane ki kahan kitne Thikane khul jaa.en
lab-kusha hon to bikhar jaa.en fasane kitne
chup jo ho ja.un to auraq purane khul jaa.en
is aqidat ko mohabbat se badal le ‘salim’
kya pata kab tiri tasbih ke daane khul jaa.en
Leave a Reply